Protesta te Kryeministria në Tiranë u përshkallëzua më 31 tetor, me përdorim të gazit lotsjellës dhe ujit me presion nga policia, ndërsa drejt një autoblinde u hodh molotov. Ishte protesta e 19-të kundër kryeministrit Edi Rama.
Forca të shumta policie u vendosën në gatishmëri te Kryeministria. Dy autobotë u pozicionuan aty dhe drejt protestuesve u hodh ujë me presion për t’i shpërndarë, e më pas gaz lotsjellës me intensitet.
Droni i policisë bie mbi protestuesit
Sipas Balkanweb, droni i Policisë së Shtetit, që dyshohet se hidhte gaz lotsjellës nga ajri, ka rënë mbi protestuesit. Pas kësaj, forca të shumta policie u drejtuan për të larguar qytetarët nga zona e Kryeministrisë.
Autoblindat në bulevard, protestuesit në rrugica
Policia vendosi autoblindat në bulevardin Dëshmorët e Kombit. Protestuesit e shumtë u shpërndanë në rrugën Myslym Shyri dhe në rrugicat përreth, ndërsa efektivët i ndoqën. Ndaj një autoblinde u hodh molotov.
Një protestues deklaroi se është goditur nga civilë me levë hekuri dhe se nuk ka mbështetje nga shteti.
