Pretendohet se biseda e ministrit të Drejtësisë, Toni Gogu, me Erion Veliajn në burgun e Fierit është regjistruar nga shërbime të huaja, të cilat dyshohet se kishin nën vëzhgim një të burgosur tjetër në të njëjtin institucion. Dyshohet gjithashtu se pas reagimit publik të Gogut, SPAK e ka kontaktuar për të kërkuar sqarime. Asnjë nga të dyja nuk është konfirmuar zyrtarisht.
Sipas informacionit që po qarkullon, regjistrimi nuk lidhet domosdoshmërisht me një pajisje të vendosur posaçërisht për takimin Gogu–Veliaj. Do të bëhej fjalë për një operacion monitorimi ndaj një personi tjetër të privuar nga liria, gjatë të cilit biseda e ministrit me kryebashkiakun mund të jetë kapur me përgjimin e komunikimeve apo të ambientit ku ndodhej ai person.
Deri tani nuk ka konfirmim zyrtar për ekzistencën e regjistrimit, për shërbimin që pretendohet ta ketë realizuar apo për përmbajtjen e mundshme audio. Asnjë institucion nuk ka publikuar dokument që i vërteton këto pretendime.
Sipas të njëjtit informacion, pas postimit të Gogut, ai është kontaktuar drejtpërdrejt nga persona të lidhur me SPAK, që i kanë kërkuar të paraqitej për sqarime. Pretendohet se ministri e ka kundërshtuar nevojën për sqarim, duke argumentuar se vizitën e kishte bërë vetë publike. “Por unë e deklarova vetë”, thuhet se ka qenë përgjigjja e tij, ndërsa pala tjetër i është përgjigjur: “Pikërisht”.
Nëse konfirmohet, ky shkëmbim do të nënkuptonte se interesi i SPAK nuk ishte te fakti i vizitës, por te rrethanat e saj, mënyra si u zhvillua takimi dhe përmbajtja e bisedës me Veliajn. SPAK nuk ka dalë me njoftim zyrtar për telefonatën, kërkesën për paraqitje apo ndonjë veprim procedural ndaj ministrit.
Vetë Gogu ka pranuar publikisht se e takoi Veliajn të premten, më 30 tetor, në burgun e Fierit. Ai tha se vizita ishte pjesë e detyrave institucionale, për t’u njohur me kushtet e trajtimit të kryebashkiakut dhe për të dëgjuar shqetësimet e avokatit të tij, Plarent Ndreca. Gogu mohoi kategorikisht se ka përcjellë ultimatum apo kërcënim në emër të kryeministrit Edi Rama dhe tha se me Veliajn e lidh një miqësi e hershme.
Avokati Ndreca ka këmbëngulur se ministri i kërkoi Veliajt të dorëzonte mandatin, t’u delegonte kompetencat personave të zgjedhur nga Rama dhe të hiqte dorë nga mbrojtja ligjore. Në rast refuzimi, sipas këtij versioni, kryebashkiakut i bëhej kërcënim me transferim në burg tjetër dhe me hetime të reja nga SPAK.
Përplasja mes dy versioneve e ka bërë takimin çështje me interes politik e institucional. Nëse ekziston regjistrim i bisedës, ai mund të ndihmonte të sqarohej çfarë u tha në fakt në Fier dhe nëse mesazhi që i atribuohet Ramës u përcoll apo jo.
