Një shtetas nga Kosova, 46 vjeç, ka vdekur në një aksident rrugor në livadhet e fshatit Domaj, në njësinë administrative Gjinaj, në Has, pasi mjeti sportiv që drejtonte është përmbysur.
Viktima me iniciale A. Q. ishte drejtuesi i mjetit. Në aksident ka mbetur i lënduar edhe vëllai i tij, V. Q., 38 vjeç.
I plagosuri është transportuar në spitalin e Kukësit, ku po merr ndihmë mjekësore.
Sipas informacionit paraprak të Policisë, dyshohet se mjeti është përmbysur aksidentalisht, gjë që ka shkaktuar vdekjen e 46-vjeçarit.
Grupi hetimor ndodhet në vendngjarje dhe po kryen veprimet për të zbardhur rrethanat e shkaqet e plota të ngjarjes.
