Bordi i Transparencës uli çmimin e naftës me 6 lekë, duke e caktuar në 212 lekë për litër në shitjen me pakicë. Benzina nuk pësoi ndryshim dhe do të shitet përsëri 179 lekë për litër.
Vendimi u mor më 31 tetor 2026, gjatë mbledhjes së radhës së bordit, në bazë të Vendimit të Këshillit të Ministrave nr. 711 për shpalljen e situatës së veçantë në tregun e hidrokarbureve dhe të Ligjit 8450 për tregtimin e naftës, gazit dhe nënprodukteve të tyre.
Për gazoilin e standardit SSH EN 590, çmimi me pakicë nuk duhet të kalojë 212 lekë për litër, ndërsa ai me shumicë 200 lekë për litër. Për benzinën, çmimi maksimal me pakicë është 179 lekë për litër dhe me shumicë 167 lekë për litër.
Çmimet hynë në fuqi të njëjtën ditë në orën 12:00 dhe do të vlejnë deri në mbledhjen e ardhshme të bordit, ku do të pasqyrohen ndryshimet e reja.
Bordi i kujtoi të gjithë operatorëve të shitjes me shumicë dhe pakicë se janë të detyruar ta zbatojnë vendimin. Në rast shkeljesh të konstatuara, parashikohet pezullimi i aktivitetit.
Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë janë angazhuar të mbrojnë interesat e konsumatorëve dhe parimet e konkurrencës së ndershme në treg.
