Nxënës të gjimnazit “Naim Frashëri” të Durrësit, që ndodheshin në një udhëtim turistik në Mal të Zi, u mbajtën për disa orë në ambientet e policisë në Kotor, pasi autobusi dhe furgoni me të cilët udhëtonin u ndaluan nga forcat e rendit. Në mjete ishin nxënës të mitur dhe mësues shoqërues.
Në fillim, familjarëve nuk u ishte bërë e ditur shkaku i ndalimit. Për këtë arsye, ata kërkuan ndihmën e Ambasadës Shqiptare në Mal të Zi dhe të institucioneve arsimore në Durrës.
Më vonë u mor një informacion tjetër, sipas të cilit ndalimi dyshohet se lidhet me një incident me disa nxënës. Sipas këtij pretendimi, tre prej tyre kanë bërë gjestin e shqiponjës me duar, ndërsa një nxënës tjetër dyshohet se është përfshirë në një përplasje me një grua malazeze, e cila pastaj ka njoftuar policinë.
Sipas informacioneve të fundit, pjesa më e madhe e grupit është larguar nga komisariati dhe është nisur drejt hotelit. Katër nxënës dhe një mësuese raportohet se vijojnë të jenë në ambientet e policisë në Kotor.
Deri tani nuk ka konfirmim zyrtar për rrethanat e incidentit dhe as për arsyen e saktë të ndalimit të grupit. Kërkohet sqarim nga Ambasada Shqiptare në Mal të Zi, Ministria për Evropën dhe Punët e Jashtme, autoritetet policore malazeze dhe Drejtoria Arsimore në Durrës, për të sqaruar çfarë ka ndodhur dhe pse nxënësit e mitur u mbajtën për kaq shumë orë.
